Punjab Bolda Television news website
ਇਨ੍ਹਾਂ ਉਤਪਾਦਾਂ ਨੂੰ ਵੰਡ ਕੇ ਮਨਾਉਣਗੇ 75ਵਾਂ ਅਜ਼ਾਦੀ ਮਹੋਤਸਵ
GURSHARAN SINGH SANDHU and Amrik Singh
ਅੰਮ੍ਰਿਤਸਰ 14 ਅਗਸਤ
ਭਾਰਤ ਦੀ ਆਜ਼ਾਦੀ ਦੇ 75 ਸਾਲਾਂ ਦੇ ਅਜ਼ਾਦੀ ਕਾ ਅੰਮ੍ਰਿਤ ਮਹੋਤਸਵ ਮੌਕੇ ਡਿਪਾਰਟਮੈਂਟ ਆਫ ਐਪਰਲ ਐਂਡ ਟੈਕਸਟਾਈਲ ਟੈਕਨਾਲੋਜੀ ਦੇ ਵਿਦਿਆਰਥੀਆਂ ਨੇ ਰਹਿੰਦ-ਖੂੰਹਦ ਵਾਲੇ ਡੈਨਿਮ ਉਤਪਾਦਾਂ ਦੀ ਅਪਸਾਈਕਲਿੰਗ ਰਾਹੀਂ ਵਾਤਾਵਰਣ ਦੀ ਸੰਭਾਲ ਕਰਕੇ ਮਨਾਉਣ ਦਾ ਫੈਸਲਾ ਕੀਤਾ ਹੈ।
ਭਾਰਤ ਦੀ ਆਜ਼ਾਦੀ ਦੇ 75ਵੇਂ ਸਾਲ ਦੇ ਜਸ਼ਨ ਨੂੰ ਮਨਾਉਣ ਲਈ, ਡਿਪਾਰਟਮੈਂਟ ਆਫ ਅਪੈਰਲ ਐਂਡ ਟੈਕਸਟਾਈਲ ਟੈਕਨਾਲੋਜੀ ਦੇ ਵਿਦਿਆਰਥੀਆਂ ਨੇ ਪੁਰਾਣੀ ਡੈਨਿਮ ਜੀਨਸ ਦੇ 75 ਉਤਪਾਦ ਤਿਆਰ ਕੀਤੇ। ਐਮ.ਐਸ.ਸੀ. (ਐਪਰਲ ਐਂਡ ਟੈਕਸਟਾਈਲ) ਅਤੇ ਬੀ.ਟੈਕ. (ਟੈਕਸਟਾਈਲ ਪ੍ਰੋਸੈਸਿੰਗ ਟੈਕਨਾਲੋਜੀ) ਦੇ ਵਿਦਿਆਰਥੀਆਂ ਨੇ ਆਪਣੇ ਦੋਸਤਾਂ ਅਤੇ ਪਰਿਵਾਰਕ ਮੈਂਬਰਾਂ ਤੋਂ ਪੁਰਾਣੇ ਡੈਨੀਮ ਇਕੱਠੇ ਕੀਤੇ। ਜੀਨਸ ਦੇ ਇਹਨਾਂ ਪੁਰਾਣੇ ਜੋੜਿਆਂ ਨੂੰ ਕੁਝ ਨਵਾਂ ਅਤੇ ਬਿਹਤਰ ਉਤਪਾਦਾਂ ਜਿਵੇਂ ਕਿ ਕਰਿਆਨੇ ਦੇ ਬੈਗ, ਹੈਂਡ ਬੈਗ, ਸਾਫਟ ਜੁੱਤੇ, ਪਾਣੀ ਦੀਆਂ ਬੋਤਲਾਂ ਦੇ ਬੈਗ, ਰਜਾਈ, ਪਰਸ, ਸਿਰਹਾਣੇ, ਐਪਰਨ, ਪੋਟ ਹੋਲਡਰ, ਪਲੇਸਮੈਟ, ਬੈਲਟ, ਬਿਨ, ਵਾਲ ਹੈਂਗਿੰਗਜ਼, ਚੱਪਲਾਂ, ਮੁੰਦਰਾ, ਹੇਅਰ ਬੈਂਡ, ਆਦਿ ਵਿੱਚ ਅਪਸਾਈਕਲ ਕਰਕੇ ਨਵੇਂ ਅੰਦਾਜ਼ ਵਿਚ ਪੇਸ਼ ਕਰਨਗੇ। ਵਿਦਿਆਰਥੀਆਂ ਦੀਆਂ ਆਪਣੀ ਸਿਰਜਣਾਤਮਕਤਾ, ਨਵੀਨਤਾ ਅਤੇ ਸਖ਼ਤ ਮਿਹਨਤ ਜ਼ਰੀਏ ਵਿਲੱਖਣ, ਟਿਕਾਊ ਅਤੇ ਹੱਥ ਨਾਲ ਬਣੇ ਉਤਪਾਦ ਇਸ ਅਜ਼ਾਦੀ ਦਿਵਸ ਮੌਕੇ ਵੰਡੇ ਜਾਣਗੇ।
ਡਾ. ਸਚਿਨ ਕੁਮਾਰ ਗੋਦਾਰਾ, ਅਸਿਸਟੈਂਟ ਪ੍ਰੋਫ਼ੈਸਰ ਡਿਪਾਰਟਮੈਂਟ ਆਫ਼ ਐਪਰਲ ਐਂਡ ਟੈਕਸਟਾਈਲ ਟੈਕਨਾਲੋਜੀ ਨੇ ਦੱਸਿਆ ਕਿ ਜੀਨਸ/ਪੁਰਾਣੇ ਕੱਪੜਿਆਂ ਦੇ ਜੋੜੇ ਅਪਸਾਈਕਲ ਕਰਨ ਦਾ ਮੁੱਖ ਉਦੇਸ਼ ਲੋਕਾਂ ਵਿੱਚ ਵਾਤਾਵਰਣ ਪ੍ਰਤੀ ਜਾਗਰੂਕਤਾ ਪੈਦਾ ਕਰਨ ਦੇ ਨਾਲ ਨਾਲ ਇਨ੍ਹਾਂ ਉਤਪਾਦਾਂ ਨੂੰ ਟਿਕਾਊ, ਫੈਸ਼ਨੇਬਲ ਅਤੇ ਕਿਫਾਇਤੀ ਬਣਾਉਣਾ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਤਰ੍ਹਾਂ ਟੈਕਸਟਾਈਲ ਉਤਪਾਦਾਂ ਲਈ ਅਪਸਾਈਕਲਿੰਗ ਪਹੁੰਚ ਦਾ ਵਿਚਾਰ ਰਚਨਾਤਮਕ ਅਤੇ ਨਵੀਨਤਾਕਾਰੀ ਨੌਜਵਾਨ ਦਿਮਾਗਾਂ ਤੋਂ ਰੁਜ਼ਗਾਰ ਦੇ ਨਵੇਂ ਮੌਕੇ ਅਤੇ ਉੱਦਮੀ ਵੀ ਪੈਦਾ ਕਰ ਸਕਦਾ ਹੈ। ਭਾਰਤ ਸਰਕਾਰ ਨੇ ਸਿੰਗਲ ਯੂਜ਼ ਪਲਾਸਟਿਕ `ਤੇ ਪਾਬੰਦੀ ਲਗਾਉਣ ਦੀ ਪਹਿਲ ਕੀਤੀ ਹੈ ਅਤੇ ਅਜਿਹੇ ਉਤਪਾਦਾਂ ਨੂੰ ਇਸ ਮੌਕੇ ਬਿਹਤਰ ਢੰਗ ਨਾਲ ਪੇਸ਼ ਕੀਤਾ ਜਾਣਾ ਚਾਹੀਦਾ ਹੈ।
ਵਿਭਾਗ ਦੇ ਮੁਖੀ ਡਾ. ਸੁਖਪ੍ਰੀਤ ਸਿੰਘ ਨੇ ਦੱਸਿਆ ਕਿ ਜੀਨਸ ਦੀ ਅਪਸਾਈਕਲਿੰਗ ਤੋਂ ਤਿਆਰ ਕੀਤੇ ਗਏ ਬੈਗ ਰੋਜ਼ਾਨਾ ਕਰਿਆਨੇ ਦੀਆਂ ਵਸਤੂਆਂ, ਸਬਜ਼ੀਆਂ, ਫਲਾਂ ਅਤੇ ਦੁੱਧ ਤੋਂ ਬਣੀਆਂ ਵਸਤਾਂ ਲਿਜਾਣ ਲਈ ਵਰਤੇ ਜਾ ਸਕਦੇ ਹਨ। ਇਹ ਬੈਗ ਸਮੇਂ ਦੇ ਹਾਣ ਦੇ ਹੋਣ ਕਰਕੇ ਨੌਜਵਾਨ ਵੀ ਇਨ੍ਹਾਂ ਬੈਗਾਂ ਨੂੰ ਚੁੱਕਣ ਤੋਂ ਸੰਕੋਚ ਨਹੀਂ ਕਰਨਗੇ। ਇਹਨਾਂ ਬੈਗਾਂ ਅਤੇ ਹੋਰ ਅਪਸਾਈਕਲ ਕੀਤੇ ਉਤਪਾਦਾਂ ਦੀ ਵਰਤੋਂ ਇੱਕ ਟਿਕਾਊ ਪਹੁੰਚ ਹੈ ਅਤੇ ਭਾਰਤ ਸਰਕਾਰ ਦੇ ਮਿਸ਼ਨ ਨੂੰ ਸਫਲ ਬਣਾਉਣ ਲਈ ਵਾਤਾਵਰਣ `ਤੇ ਘੱਟ ਤੋਂ ਘੱਟ ਪ੍ਰਭਾਵ ਪਾਉਂਦੀ ਹੈ। ਅੰਮ੍ਰਿਤਸਰ ਲਈ “ਆਜ਼ਾਦੀ ਕਾ ਅੰਮ੍ਰਿਤ ਮਹੋਤਸਵ” ਦੇ ਇਹਨਾਂ 75 ਸਾਲਾਂ ਦੇ ਯਾਦਗਾਰੀ ਸਮਾਗਮ ਨੂੰ ਮਨਾਉਣ ਲਈ ਵਿਭਾਗ ਵੱਲੋਂ ਜਿਥੇ ਪਲਾਸਟਿਕ ਦੀ ਨਾ ਕਰਨ ਦਾ ਸੁਨੇਹਾ ਦਿੱਤਾ ਜਾ ਰਿਹਾ ਹੈ ਉਥੇ ਪੁਰਾਣੀ ਡੈਨਿਮ ਜੀਨਸ ਤੋਂ ਬਣੇ ਉਤਪਾਦ ਯੂਨੀਵਰਸਿਟੀ ਨਿਵਾਸੀਆਂ ਅਤੇ ਵਿਦਿਆਰਥੀਆਂ ਵਿੱਚ ਵੰਡ ਕੇ ਨਵੀਨ ਪਿਰਤ ਵੀ ਪਾਈ ਜਾ ਰਹੀ ਹੈ।
ਉਨ੍ਹਾਂ ਕਿਹਾ ਕਿ “ਅਪਸਾਈਕਲਿੰਗ” ਸ਼ਬਦ 1994 ਵਿੱਚ ਰੇਇਨਰ ਪਿਲਜ਼ ਦੁਆਰਾ ਦਿੱਤਾ ਗਿਆ ਸੀ ਜਿਸ ਵਿਚ ਪੁਰਾਣੇ ਜਾਂ ਵਰਤੇ ਗਏ ਉਤਪਾਦਾਂ ਵਿੱਚ ਮੁੱਲ ਜੋੜਨ ਦੇ ਸੰਕਲਪ ਦੀ ਵਿਆਖਿਆ ਕੀਤੀ ਸੀ, ਜੋ ਕਿ ਰੀਸਾਈਕਲਿੰਗ ਦੀ ਪ੍ਰਸਿੱਧ ਧਾਰਨਾ ਤੋਂ ਬਿਲਕੁਲ ਵੱਖਰਾ ਹੈ ਜੋ ਉਤਪਾਦਾਂ ਵਿਚ ਲਾਗਤ ਨੂੰ ਘਟਾਉਂਦਾ ਹੈ। ਡੈਨੀਮ ਜੀਨਸ ਹਰ ਉਮਰ ਦੇ ਸਭ ਤੋਂ ਪ੍ਰਸਿੱਧ ਕੱਪੜੇ ਹਨ। ਇਹ ਖਾਣਾਂ/ਫੈਕਟਰੀਆਂ ਵਿੱਚ ਕੰਮ ਦੇ ਪਹਿਨਣ ਤੋਂ ਲੈ ਕੇ ਫੈਸ਼ਨ ਡਿਜ਼ਾਈਨਰ ਕਪੜਿਆਂ ਤੱਕ ਫੈਲੇ ਹੋਏ ਹਨ। ਡੇਨਿਮ ਇੱਕ ਬਹੁਤ ਮਜ਼ਬੂਤ ਅਤੇ ਟਿਕਾਊ ਫੈਬਰਿਕ ਹੈ ਅਤੇ ਇਸ ਦੀ ਅਪਸਾਇਕਲਿੰਗ ਨਵੇਂ ਉਤਪਾਦਾਂ ਲਈ ਚੰਗਾ ਨੁਕਤਾ ਸਿੱਧ ਹੋ ਸਕਦਾ ਹੈ।
